Lo 31 de març, se manifestarà a Tolosa per l’occitan, e dins d’autras regions per d’autras lengas regionalas.

La FELCO i serem, e sonam nòstres aderents coma totes los amics de l’occitan dins l’escòla publica a i èstre tanben.

Coma se sap, aviam prepausat a un moment que s’organizèsson tres manifestacions regionalas lo meteis jorn, dins diferentas regions, pas solament en Lengadoc, e en particular aquí ont lo combat per la lenga es lo mai malaisit, au nord e en Provènça, per fin de multiplicar lo resson mediatic de nòstras revendicacions, e d’implicar localament de mond qu’aurián pas fach lo sacrifici d’un viatge luenh d’en aquò sieu… Amb aquò, lo contèxte de la campanha presidenciala, que se podiá preveire (e se vei ara) que seriá aspre - invitava a procedir amb una granda prudéncia per de dire de pas daissar pensar que marchàvem per un o l’autres dels partits en lici, e per afortir que, coma associacions culturalas, es l’ensems del mond politic qu’interpelàvem.

Tot aquò o avèm dich francament.

Mas çò important ara es de capitar la mobilizacion. La manifestacion se fa a Tolosa, es aquí que cal èstre, e i cal estre nombroses.

Per çò qu’es aital que podrem capitar, amb l’ajuda de las manifestacions que se faràn en Bretanha, en Bascoat, en Catalonha... d’aver un resson mediatic nacional - e pas solament local - que faga saber a l’opinion coma als politics la realitat e la fòrça de nostras revendicacions..

Es per aquò que los de l’ensenhament public, la FELCO, serem a Tolosa lo 31 de mars, cotria amb totes los que vòlon un avenidor per nòstra lenga. Nos farem veire, e nos farem entendre.

Vos sonam a signar e faire signar la crida en clicar sul ligam.

Fasèm fisança, dempuèi nòstra AG de Rodés julhet 2011, al CREO Miègjorn Pirenèus per seguir l’accion ; nòstres collègas organizaràn l’acuelh sus plaça dels ensenhaires del public, s’entrevan tanben de la visibilitat especifica de nòstre cortègi d’ensenhaires del public, de drapèls son estats comandats : seràn a la disposicion del mond (a l’entorn de 10 euros pèça, per totes los que voldràn plan ajudar) : es important que l’ensenhament public se veja dins la manif.

Anem, Òc, per la lenga occitana !