Letra de ligason n°3 – Febrier de 2012

Adieu en totei

Quauquei nòvas frescas (e pron frejas !) a prepaus de nòstra manifestacion.

1 – Anar a Tolosa lo 31 de març !

Aquò bolèga un pauc d’en pertot per organizar lo desplaçament fins a Tolosa.

■ Au jorn de uei, son anonciats d’autobús venent de :

• Agde : Calandreta e Cranc de Massilhan • Gironda (2) : IEO 33-ostau occitan • Narbona : IEO 11 • Carcassona (2) : IEO 11 • Niça : IEO 06 • Perigüers (2) : IEO 24-Novelum • Rodés (2) : CCOR Collectif Rodez • Espalion : CCOR Collectif Rodez • Decazeville ? • Porte-les-Valence/Montelimar/Bollène : IEO 26 • Maison de la Culture Occitane (65) • Ardèche nord ; IEO 07 • Gramat/Cahors : IEO 46 e Calandreta L’Esquirol • Marselha : IEO 13 • Mesa : Cercle occitan / Calandreta • Montpelhier : IEO 34 • Sèta : IEO 34 • Clarmont d’Erau : IEO 34 / Los « Tega-los » • Isla de Baish (Ile Jourdain) (2) :Carnaval Gascon" e "Escota & Minja" • Valadas Occitanas Italia : Chambra d’òc • Pais Valencian : Lluis Fornés • Nimes : IEO 30/MARPOC • Eth Ostau Comengés • Barcelona : CAOC • Marmanda : ATP de Marmanda • Lemòtges : I.E.O. Lemosin • Vilanòva d’Òlt : E.O.E

D’unei bus que s’entornaràn tre 6 oras a la fin de la manifestacion e d’autrei après lo Concèrt.

Per leis organizators dau desplaçament : preveire que cada bus, nos deurà transmetre lo nom d’un responsable ambé un numerò de portable onte lo poirem jonher de lòng dau viatge, lo jorn de la manifestacion (de còps que nos fariá mestier de jónher lo bus, avans son arribada). Vos donarem, d’aquí lo 31, una ficha explicativa ambé lei consignas mai detalhadas coma laissar lo monde, s’anar ramblar e lo tornar puei recuperar…

Aquelei que serián interessats per se jónher a un d’aquestei bus an que de contactar la Coordinacion que li comunicarà lei coordonadas necessàrias.

■ Una autra possibilitat : lo coveituratge !

Podètz tanben cercar vòstre bonur en participant au co-veituratge, sigue coma menaire (a), sigue coma passatgier(a).

Veire leis ofèrtas e lei demandas : Site co-veituratge “Anem òc ! Per la lenga occitana !” : http://agenda.covoiturage.fr//festi...

2 – Lo materiau de promocion :

  Novèutat : La CRIDA 2012 version papier

La version papier de la Crida (multivariantas/veire pèça joncha) es a disposicion. La podètz comandar : 5€ (+pòrt) lei 100. Gemma : 2012@manifestarperloccitan.com / 05 34 44 97 11

  Leis afichas (0,15€ l’una) : dos formats : 40 X 60 e pichonas 30 X 40. De comandar a Gemma.

  Lo Site : Totei lei visuaus ambé tanben lo dorsier de premsa se l’i pòdon descargar : anemoc.org L’i trobaretz tanben, comunicats, letras e autreis informacions…

3 – Lei comitats locaus :

• Avèm de nòvas dau Comitat locau tolosan « Anem Òc ! Per la lenga occitana ! » que tot plen de vòlha es a s’organizar per faire una campanha d’afichatge sus Tolosa e son relarg ! An realizat un flyer que van distribuïr a desenaus de milierats sus lo grand Tolosa… E qu’an encara ben d’autrei projèctes ! Per lo jónher : comitat.tolosa@gmail.com

Acamp venent : divendres 10 de febrier a 18h30, a l’Ostal d’Occitània, 11 carriera Malcosinat.

• S’avèm de nòvas per l’organizacion dei desplaçaments, nos manca un pauc de ressons deis accions que fasètz per faire assaupre la manifestacion. Oblidetz pas de faire remontar a la Coordinacion vòstreis actualitats : conferéncias/debats/vespradas festivas/ conferéncias de premsa/articles de jornaus/contactes ambé leis elegits…

4 – Lo vilatge occitan : Esperetz pas tanben lo darrier moment per vos marcar. L’inscripcion tre ara simplifica la vida en totei.

5 – Ajuda a l’organizacion : La rampelada a benevòles per completar la chorma d’organizacion es totjorn d’actualitat ! Pensatz de vos marcar per acompanhar lo debanament d’aquesta jornada en ligason ambé lei responsables de la Coordinacion.

Me marqui per ajudar au bòn debanament de la jornada dau 31 de març de 2012 e dau passacarriera :

Nom : ……………………………….. Pichòt nom : …………………………………….

Email : …………………………………………… Telefonet : ……………………………

Pensi d’arribar devèrs …. oras

6 – Sosten financier :

Mai que jamai avèm besonh de vòstre obòle (tant pichona que sigue !) se volèm contunhar de faire avans, (60% deductibles deis impòsts), que lei constrenchas en matèria de securitat, de secorisme, de tecnica son importantas … alora mercé de vòstra ajuda :

« Anem Òc ! per la lenga occitana ! » Sosten financier a l’organizacion de la manifestacion.

Nom : ……………………………………………….... Pichòt nom …………………………………………………. Adreiça : ……………………………………………………………….…………… Còde postau ………………………….. Vila …………………………… email …………………………………………………………..……….. fau un don de sosten a la manifestacion per l’occitan organizada, lo 31 de març de 2012, per la Coordinacion « Per la lenga occitana ! »

Mandi un chèc de _____________ € a l’òrdre de : IEO-Coordinacion. Reçauprai un justificatiu de don a una associacion reconoissuda d’utilitat publica per l’administracion fiscala.

De tornar ambé lo chèc a : IEO-Coordinacion / 11 Rue Malcosinat 31000 Toulouse. 05 34 44 97 11

7– Quauqueis eveniments avans la Manifestacion :

  Dissabte 17 de març : La Primada de Montsegur ambé Convergéncia Occitana. Tota la jornada : cançon, taula redonda, comemoracion, cap a l’avenidor... Un recampament que serà una ocasion de mai d’assabentar lo monde sus la Manifestacion.

  Dissabte 30 de març, a 19h, a Tolosa, au ras deu "Stadium" de Tolosa, sus un terrenh annèx.

Rescòntre internacionau de Fotbòl entre Occitània e Sapmis ("Laponia")

organizat per L’Institut d’Estudis Occitans (IEO) ambé l’Associacion Occitana de Fotbòl (AOF), dins lo quadre d’una accion de sensibilizacion de la joinessa e de la populacion en generau a la lenga e a la cultura occitanas, ai lengas minorizadas en generau. Entrada a gràtis www.ieo-oc.org / www.occitania-fotbol.com

Signar La CRIDA ! Emai se podètz pas èstre ambé nautrei lo 31 de març, mostratz pasmens vòstra volontat que s’espandissan nòstra lenga e nòstra cultura, que lei volètz pas laissar escafar !!!

Eriam 25000 a Carcassona en 2009, alora emai se totei lei manifestants son pas sus Internet… aquò deuriá faire un brave molon de signaturas sus lo site… per ara n’i a pas pron per mostrar que lo monde vòu d’occitan dins sa vida !!!

Alora, anatz-i lèu, lèu per faire vòstre clic : http://anemoc.org/node/140/signatures e pensatz de la faire tanben signar a vòstre entorn, an aquelei que son sensibles a la question dei lengas regionalas sensa oblidar vòstreis elegits…

Anem ! Òc ! Per la lenga occitana !